Merel (kliester) en zangliester

Dizze òfbeeldeng is van n zangliester (Letien: Turdus philomenos). Ien t nust zitten 3 jongen en warschienlek n gel ei.

Kleur van t ei liekt groeneg, mor is feitlieks felblaauw met zwadde stippen. Bizunder aan t nust is, dat e waand aan e binnenkaant huulmoal van leem is. Olders bekleden t nust niet met dreug gras. Mor goed, jongen worden der wel om groot.

Merel het doar aandere ideeën over. n Aandere noam die ien t Grunnegs veur merel bruukt wordt, is kliester (Letien: Turdus merula). Zangliester en merel bennen van zulfde femilie van liesterachtegen. Ien dit merelnust zitten mor liefst zes eier. Dat is uutzunderlek. Ik heb ien elk geval mor 1 keer n nust met legsel van 6 eier vonden. Gewoonlieks het merel voak 4-5 eikes. Kleur is blauwgroeneg, met roestroodbrune vlekken en stipkes. Zaangliester kriegen dus n wat schroalere opvoedeng, om zo te zeggen. Merels worden ien e watten leid, bij wieze van spreken dan. Of doarmet t verschil ien zang tussen merel en zangliester te verkloaren valt, wel et wiet, mag t zeggen.

Bosrietzanger ien brannekkels

Dit het wel wat weg van n karrekiet. 

Tekeneng van eikes, gespikkeld, met bruneg, oliefkleurege vlekken. Allenneg zit dit nust niet ien e rijten, mor ien e brannekkels. Ondergrond van eikes is ok lichtblaauweg en gien bruneg, as bij karrekiet. 

Source: wikimedia Аимаина хикари

 t Nustje is van de Bosrietzanger (Letien: Acrocephalus palustris). t Bizundere is, dat t nustje verscholen zit onder t blad van jonge branekkels. Mor t nustje is vlochten aan  olle brannekkelsstangen van verleden joar. Meer ienformoatsie over t vogeltje: op wikipedia. 

Met dat branekkels groder worden, wordt t nustje meer aan t oog onttrokken. Branekkels schieten de lucht ien, t nustje blift op zulfde hoogte. Wel bizunder baauwbeleid. 

Pepoavers ien blui

Pepoavertied. 

Noa de klaprozen, is t tied veur pepoavers. Ze hemmen gien goeie tied uutkozen om te bloeien. Klaprozen harren et dit joar al stoer. Pepoavers kommen en goan ien n vloek en zucht. 

Dizze tied van regen en buien bekört de bluitied slim. Ze goan op e eerste dag oarzelnd open, sums mor veur de helft. Dan bloeien ze n dag of wat. 

Mor zo nou en dan vallen noa een dag kroonbladjes aal òf. 

Wat ken-je der nog meer van zeggen, behalve dat ze mooi bennen. 

Aander joar beder.  

Doar bennen ze dan

 t Was zo rusteg ien kestanjeboom, dat ik docht dit wordt hum niet. 

Op n mirreg heurde k wat votvliegen. Ze warren der toch nog! De holtduven ien e kestanjeboom. 

Twee dikbekken van jonge holtduven (Letien: Columba palumbus; En: Wood pigeon) zaten me tussen t kestanjeblad stil aan te kieken.

Moekes mooisten bennen et niet, zol je denken, as je ze zo zien. Pielken van nije veren kommen deur t dons hin. Mor t is nog even òfwachten. De snoavel is ien verholdeng iendrukwekkend groot. 

k Verboas me der over hoe stil duven wezen kennen en hoe onopgemerkt ze hinneweer vliegen. Roar is dat. As je der niet op verdacht bennen, ontgijt je et finoal dat ze n nust ien e boom hemmen.   

Rijtvink en zwartpootsoldoat

Noamen zeggen niet altied even veul. 

Om mien kennis van planten te vergroten he'k n app doar ik allerhande soorten met opzoek. Dizze kevers hierboven bennen twee zwartpootsoldoaten. Me dunkt dat ze wat aans doen as oorlogvoeren.

Zo trof ik ok dizze rups aan. Rijtvink - Rietvink op zien Nederlaands. 

Dizze rups hier liekt wel de oar van n grasspier. Met zien/heur koaken vret de rups de grasspier op, en zo komt er aals mor leger. Wel wiet zit er aan t enne van de dag aan e grond.  

 

Holtduvenust ien kestanjeboom

Dit joar hemmen we gasten kregen ien onze kestanjeboom.

Sinds n aantal joaren snoei k onze kestanjeboom. D'eerste keer da'k kestanjebomen zag, die snoeid warren, was ien Tsjechië. Ien Nederlaand zien je dat zo wat noeit. Mor, woarom niet, zol k zeggen. Noadeel is dat je ien t veujoar gien mooie kestanjebloesem hemmen. 

Veurdeel is dat duven makkelek n plak vienden om n nust te baauwen. Holtduven, en aandere duven ok, leggen altied twee eier. t Duufke, dan wel te verstoan. Eier wat kleiner as krielpiekeier. Woarom duvesoorten niet meer as twee eier ien n nust leggen, Joost mag t wieten.  

Mor as je noar t nust kieken, liekt et meer as genog. t Nust is zo plat, met wat wiend is et n toer om eier binnen te holden. 

t Was wel stoer om t nust wat goed op foto te kriegen.  

 

 

Grutto op betunpoal

Ien e boskes verscholen het dizze grutto gien wiet van minsen ien noabijheid. 

Of misschien ok wel, mor stelt vogel der weineg belang ien. Zo verkropen ien boskes, voel je je toch wat meer een met noatuur. Tussen brandekkels, elderstruken, snielings, rijten, moerasspirrea zigt de wereld der toch wat aans uut.

Dizze òfbeeldeng geeft zicht op t verbiendengsdiepke tussen t Van Starkenborghkenoal en t Hoerediepke dat zo noar Nijziel stroomt. 

Op dizze òfbeeldeng zien je moerasspirearoest (n schimmel). Zo het moerasspirea zunder ien bloei te wezen n mooie oranje kleur. Bloei let nog even op m wachten.