Gedicht Deurgang op Radio Drenthe

t Gedicht Deurgang was 4 oktober op Zondagochtendlicht van radio Drenthe. 

Marjan Koekoek leest t gedicht veur op zien Drents. Dat het ze schier doan. Luuster mor even. Zondagochtendlicht - Radio Drenthe. 

t Radioprogram duurt n uur; t gedicht is te heuren bij minuut 20.50 op de tiedsbalk.

Bron

Gelster Appeloogsten (Gelselaar - Achterhoek) hemmen dit joar weer n gedichtenwedstried met t thema Bron veur Nedersaksiese poëten. 

  

Der bennen allerhaande streektaolen en streektoalen ienstuurd: uut Drenthe, Twenthe, Achterhoek, Grunneger Westerkertier en Veenkolonies. 

Negen doarvan bennen nomineerd. Appeloogsten Gelselaar: nomineerde gedichten. Mien gedicht Wotter en Stien stijt der ok tussen.

Wiendvangers

 Hoe vang-je de wiend? Hoe vang je n beeld met cameroa? 

k Ben opgroeid ien e overtugeng dat rijten onder ien slootswal en ien e sloot groeien. t Is niet woar. Rijten stoan vandoag de dag overal. t Het aalmoal te moaken met hoe der maaid wordt. En omdat der zo weineg maaid wordt, stoan rijten tegenwoordig zowat tegen e weg aan. Noatuurlek barmbeheer, hiet et. Bespoareng ken je t ok noemen. Mor de aanblik van laandwegjes is totoal aans worden. Dizze rijten stoan an e Zuderweg.

En e wiend blast deur de rijten. Rijten goan hinneweer. De tuven van e rijten vangen de zummerwiend. Veur even, dan loaten tuven lös en gijt de wiend weer vedder. Zummerwiend wordt opjagd en het hoast.

Domt komt de haarfstwiend. Ien t noajoar dansen rijten veul harder. Tot winter komt; dan stoan de tuven verstild ien t open laandschap.

Ienhold en butenkaant

t Was en t is n vremd joar, zo'n uutsproak ken je best doen ien 2020, ok aal bennen we mor n driekwart hin. Wat bepoalt nou n gewas, de vrucht, d'oogst? Dit joar hemmen we wel bizundere hoazelneuten ien tuun. Zo groot hemmen we ze nog niet had. Mor t is niet altied zo, gliek t oog zigt.

Hoe groot ok, doppen bennen leeg. Vörm en ienhold is n zoak van evenwicht; krekt as uterlek en binnenkant. Boodschap en verpakkeng. t Moet wat gliek opgoan. Dit joar is aalsmor nog op zoek noar balans.

Wendeng en ommekeer

Wat beweegt n mins zoaken aans te doen? Te emigreren, te stoppen met n studie, de weg niet ien t goan, van richteng veraandern? Zoveul vroagen doar voak geen eendudege antwoorden op bennen.

Wat beweegt dizze wurm, docht ik, toen k hum zag. k Vond dat er verrekte snel kroop. Ien 10 tellen, was er zo 4 cm vedder. As dat zo deur ging, zol hij t verkeer misschien te snel òf wezen.

Toen was der n wendeng. k Wiet niet woarom. t Ging aalmoal zo snel.

Even leek et, as was er met hum zulf ien e knup. Wat was der an e haand? Woarom dat terugtrekken?

Et duurde mor even, toen kwam der n ommekeer. De wurm nam - ok al was der asfalt overal - n aandere òfslag.

 

Slakken ien e tuun

Slakken bennen glibbereg en glad, mor t valt wat toe, zo lang je ze niet aanroaken. t Was n dreug zummer, dat je de slakken host niet zagen. Die tied is veurgoed veurbij. Der bennen zoveul!

De planten hemmen der slim van te lieden. Bier trekt slakken an. Nou wiet k wel dat veul minsen dat schande van t bier vienden. Toch, t is de moeite weerd om ns n sjempotje met bier tot an e raand ien grond te zetten, as je last van slakken hemmen. t Potje ien mien tuun was noa 2 doagen aal vol.

Nije weg leidt noar Ollehoof

Ollehoof het n nije weg kregen, of beder, ze hemmen doar n nij wegdek kregen. t Gijt om e uutvalsweg van Ollehoof noar IJzing, langs t Ollehoofster diep.
 

Wat mij bij de werkzoamheden t meeste opviel, warren de olle stienen die opdoken. Hierboven hemmen ze t asfalt der òfkrabt. Toen was t tied om met n kroan de loagen deronder vot te hoalen. Ik woande me even archeoloog.

Der warren huul wat loagen. Van ondern òf aan: geel zaand, rooie stienen (helen en kepotten), doarnoa roodachteg puun en dan nog zwart grintachteg puun.

Ik kwam der niet huulmoal uut. Tussen rooie stienen zatten ok weer donker stienen. Ien e zulfde loag. 

Wat was doar nou weer de reden van? Minsen, oldere ienwoners van Ollehoof, ik ben n nijsgiereg mins, wel ken mij vedder helpen met onderstoande vroagen over dizze weg.

Vroagen

Wanneer liepen Ollehoofsters op klompen over klei of puun noar IJzing? 

Wanneer is dizze weg veur t eerst verhard met die mooie rooie platte stienen?

Wanneer hemmen ze veur t eerst der asfalt overhin aanbrocht? 

k Heur groag van joe: willem.tjebbe.oostenbrinkATplanet.nl.  (AT = @).