Vorst over eier

Vorst is òflopen doagen over d`eier ien t piekehok trokken en nou bennen ze boarsten. 

Met oppervlakkege blik liekt et of eier op uutkommen stoan. Mor t is krekt even aans. 

Dizze driesprong van barsten verwiest noar kolde van òflopen doagen. As ze weer ontdooid bennen, zigt et oog niks meer van "kolde-iengreep". 

Pieken bennen wel voaker met leggen begonnen, met dat vorst kwam. Hoe dat komt, wiet ik niet.

Boom tegen de lucht

Kruun van dizze boom stekt òf tegen de lucht. Kromme stakken vullen t beeld. Lucht het zien wolken. 

Kommende doagen zellen we t doen moeten met veurnoamelek strakke luchten. Kwik doalt en trekt temperaturen omdel. 

Winner Borslapries 2022

t Nijs is al weer even old, mor doarom niet minder weerdevol. De nije prieswinner van de Borslapries 2022 is Arne Waldemar Lentföhr. Doarveur het er van de jury de pries van 2000 Euro ien ontvangst nemmen maggen. De pries wordt uutriekt deur de Duutse stad Bösel. 

De dichter was „beliede“ (tevreden) en bedankte Borsla-veurzitter Josef Willer en de Bürgermeister van Bösel Hermann Block. 

De gedichten hemmen as titel "Swymel in de nacht" - gedachtes over n oorlog (ien Oekraine). De teksten bennen deurdrenkt van aargenis over septiel, swak en teer toal wezen ken; de uuteenzettengen over oorlog waarken tegen t begrip ien.

n Stuk tekst uut t gedicht "Ornithology" 

Hij schrift mooie gedichten ien t plattduuts van Lubeck en kontreien. Doar he'k n goie opvolger met kregen. 

Kookboek Achter de koezen / Achter de kuzen

t Kookboek hiet: Achter de koezen - ien e streektoal van t Hogelandsters en Westerwol. Ien t Westerkertiers zeggen ze Achter de kuzen. 

Niek Berendsen uut Westerwol het n kookboek schreven over de Grunneger Keuken. Ja wis, die bestijt. Achter de kuzen, wil zoveul zeggen as: Dat het west. Dat kostje he'k verteerd. Die moeileke situoatsie ben k te boven kommen.  

Resepten en uutleg bennen ien t Nederlaands schreven. Benoamengen veur gerechten bennen aalmoal ien t Grunnegs weergeven. Doarmet ken elkneen met resepten aan de slag. Niet allenneg om te moaken en te eten, mor veural om vedder te ontwikkeln, want gerechten bennen noeit òf. Resepten bennen der ok veur om uut te breiden met nije mogelekheden. Aal met aal n mooi kookboek en toegelieks noaslagwaark. 

Schriever en kookliefhebber is geboren ien Taiwan en adopteerd deur n Grunneger gezin. Liefde veur koken, affiniteit veur de pervincie Grunnengen en de Grunneger keuken het der met kregen van zien femilie. Grunneger keuken is de moeite weerd. Nou heur je t ok n keer van n aander, docht ik noa t lezen. 

Haarfst ien blad

 De haarfst lopt zowat deur tot ien e winter. Veul bomen kennen t blad mor moeilek kwiet.

Lösloaten - heur-je tegenwoordeg al voaker - moeten minsen veul meer doen. 

Bij bomen gijt t aalmoal vanzulf, mor wel ales op zien tied.

Haarfst op ies

Eindelieks is t weer wat kold. t Eerste ies op t pladde dak harren we ien september. 

Nou leit der ok ies op e sloten. Smalle sloten leggen dicht en zulfs op e viever is n loagje ies te vienden. Bomen nemmen nou versneld òfscheid van heur bladden. 

Verlet van zolt?

Of zol et toch verbiendeng wezen? Sums ast n tiedje noar vee kikst, zigst allerhaande dingen. Lest zag k twee hokkelengen, n kui en bol, tegenover nkander stoan.

D'ene hokkeleng slikte d'aander. D'aander bleef rusteg en geduldeg stoan. Is et vanwege juukte van d'een? Of het d'aander verlet van kontakt? Of beidend? Of aans, zol t hokkeleng dat slikt, verlet van zolt hemmen? 

t Is aal beheurlek loat. Sunt-Meerten het aal west. En overaal lopt nog vee ien t laand. 

Dit beestje het t niet trovven bij t oversteken van e weg. 

Zo-oo zacht as n mollevel is ...