Meerkoetpiekje

 Doar is er of ze dan. n Piekje van de meerkoet op 11 april uut t ei. 

Kriegen we warm weer, wordt et koller? Wel zel t zeggen... 

Der leggen nog meer eier ien t nust, t is even òfwachten wat worden zel. 

Gedicht Zummerbries met muziek

Gedicht Zummerbries van Willem Tjebbe Oostenbrink met Klaas Jan van der Veen op euphonium.

Zummerbries op muziek.

Opnoame is moakt tiedens de prissentoatsie van de nije bundel UUTKOMST op 9 feberwoari 2024 ien Beilen. Oavend was organiseerd deur Huus van de Taol. t Gedicht Zummerbries stijt ien de bundel. 

En nog wat aans. Ien de leste editie van BLAD, t Grunneger lifestyle blad, ston n recensie van Fré Schreiber over de bundel Uutkomst.

Kiek mor even hieronder 

 

Uutkomst ienspireert Pervincioale Stoaten

20 meert was de veurdracht ien Pervincioale Stoaten van Grunnen. Wat bliekt: PS is tot nije ienzichten kommen. Je kennen rusteg stellen: Poëzie ienspireert! 

t Olle schemoa van Pervincioale Stoaten met verbeeldeng van strategische cyclus en tactische cyclus ien de trant van Mondrioan was an vervangeng toe.

Ze hemmen op 1 April n nij schemoa ontwörpen, ienspireerd deur dichtbundel Uutkomst. 

Zo bliekt dat poëzie Grunnengen ienspirereert! 

Noa de störm noar n stille Poask

t Was wat, leste weekenne wat t weer angijt. Dan weer meertse buien met hoagel, dan weer zunneschien. 

Meert roert zien steert en April dut wat er wil. Zo is t en niet aans.

Mor t weerde niet op de reigernusten. Tussen rukwienden en hoagelstienen deur rugelden eier uut t nust. Reigers kennen weer vannijs aan de bak met nije broedsel. 

Mor bedocht k me, ien dizze störm leek rusteg op d'eier zitten mij gien pretje. k Stelde me veur dat moeke-dieren misselek werden van hinneweer zoeiernde dennebomen en kokhalsend op t nust zatten.

Veur de eier moek et misschien ok niet veul uut, of ze nou ien t nust leggen bleven of dat ze op e grond kletterden. Hoeveul geklots en geschud kennen jonge embryo's ien de dooier verduren? 

t Had der veul van weg dat eier klopt werden, as onderdeel van n beslag.      

Optreden ien Pervincioale Stoaten - Aandacht

t Is Meertmoand Streektoalmoand. Doarom n veurdracht ien Pervincoale Stoaten. 

(c) Willem Tjebbe Oostenbrink 2024

t Ging over t verschil tussen aandachtspunt en prebleem. n Overzicht van termen ien t Grunnegs en ien t Hollaands. 

Veurdracht is te heuren via link: Veurdracht ien Pervincioale Stoaten.

Begun van veurdracht ongeveer op minuut: 00.16.00. 

k Moet der wat bij zeggen: k heb t ien de ienleideng over 'moeilijk'. Dat is noatuurlek ien t Grunnegs stoer. Toch bruuk k stoer niet ien d'ienleideng. Dat het te moaken met et verminderde gebruuk van 'moeilijk' ien t Hollaands en dat dit vervongen is deur 'lastig'. Dat wol ik dudelek aan de orde stellen. 

Der bennen ien t Grunnegs huul wat woorden veur perbleem: meleur, pech, trammelant, gedonder, dorie, toustand, ien zwoar weer zitten. Ok ien t Hollaands: punt van zorg, knelpunt, ding. En goa zo mor deur.  

Leste joaren is doar uutdoageng bij kommen. Crisis he'k niet opschreven, mor heurt der eiglieks ok bij. Noatuurlek stijt 'dingetje' der wel op. Dat wordt aals mor meer bruukt ien t Hollaands en niet allenneg deur managers. 

Woarom bennen der minder problemen as 30 joar leden? Woarom warren vroeger zo veul dingen moeilijk en nou niet meer? Hoe ken dat? 

De gedichten stoan ien de nije bundel Uutkomst (Huus van de Taol, Beilen 2024). Uutkomst is n mooi woord met veul betekenissen. De uutkomst van n gesprek, uutkomst van de som, eier kommen uut noa broeden, dreumen kommen uut sums. En de uutdrukkeng: Da's een uutkomst! as de oplösseng veur n perbleem.  

Börgemeester Ard van der Tuuk nemt UUTKOMST ien ontvangst

Dizze moand is Meertmoand Streektoalmoand. 

Börgemeester Ard van der Tuuk het de nije bundel UUTKOMST ien ontvangst nommen. 

Ik mocht aan t begun van de roadsvergoadereng het gedicht Grunnengen uut de nije bundel veurdroagen. 

Je kennen de veurdracht ien de roadsvergoadereng vanòf tiedstip 00.21.55 heuren: Veurdracht Gedicht Grunnengen. 

En goed nijs: de örganisoatsie Mien Westerkwartier het subsidie kregen veur heur aktiviteiten. 

 

Koeien ien buten op Heereburen

Der was n primeur òflopen zotterdag, ien elk geval veur mien ogen.

Melkkoeien overdags ien buten op Heereburen. En ze harren ok nog wat te groazen. Dat t zel wel goed kommen. 

Mor wat was et vroeg: 9 meert. Bizundere aanblik.