Kiewiet met piekjes

 Zun scheen meroakels vandoag. Wiend joeg met kracht van e haarfst over t laand. Energienet werd veur een dag waarkeloos, leek et even.

Summege vogels wieten bizundere plakken te vienden veur heur nust.

En vogels moaken heur kloar veur eier leggen, uutbroeden en t kroost te behoeden veur dreigeng en gevoaren. 

Zo warren der vanmirreg toch twee piekjes die de wereld veur t eerst ien ogenschaauw nammen.

Lammertied

Der bennen al weer huul wat lammer geboren. Dan is et n zoak van vallen en opstoan. Nog niet dreug en ze goan al op zoek noar t schoapejoar met tit: de levensbron.

Dit lamke zit nog wat ruum ien t vel.

As er wat meer melk had het, komt er steveger op e poten te stoan. Dan zel er vervast de reis annemmen. 

Hier bennen ale zaailammer bij mekoar ien t hok zet. Lekker warm op n bultje.

Kop op, narcissen!

 Hoe zol et de narcissen vergoan wezen? Zoveul snij verleden week. Alles lag plat.

Snij was op 1 april wel veur n deel vot, mor dat brocht midden op e dag narcissen nog niet terug.

Halverwege de mirreg, kwam der weer wat geels ien zicht. Ze zagen der slap uut.

 

t Was al 5 april toen narcissen heur wat oprichten. Mor kopkes niet omhoog. 

Tot der regen kwam en alles flink nat wer. En kiek ns aan. Doar stonden narcissen te stroalen boven blaauw. t Har wel wat weg van Oekraiense vlag.

Ooi op e rug

t Is weer lammertied. n Mooie tied om die lutje lammer te zien. Mor veur drachtege ooien is t ok n tied van gevoar. Leggen schoapen op onvlakke grond dan ken t wezen, dat ze te ver op e zied leggen goan en niet meer ien t enne kommen kennen. Ien groenlaand met akkers en greppels, met mollebulten of wat hoger gras lopen ooien meer gevoar. De lammer ien e buuk schuven noar de rugkaant van t schoap zo dat t schoap de poten niet meer onder de pokkel kriegen ken. 

t Is zoak om schoapen goed ien e goaten te holden. t Ken wel wat lieden, mor as n ooi n halve dag op e rug leit, dan wordt et der niet beder op. 

Dizze het et bijtieds nog red. Met wat hulp. Doarom, as je langs schoapelaand fietsen, kiek mor even of der een apad leit met poten half ien e lucht. Met n lichte drukker stijt t beest zo weer op e poten.

Snij en narcissen

Meert roert zien steert. En toen was der zo mor snij, dunnerdagmörgen.

Kopkes van narcissen gingen aals mor leger hangen. 

Noa uren snijval was an t enne van de mirreg wel aans. Narcissen hemmen t opgeven, teminten zo lang de snij der leit. 

t Geft wel meer licht, he'k vernommen vrijdagmörgen, ok al zit lucht wat dicht, snij weerkoatst t licht rondomrond.

Narcissen hemmen et der mor met te stellen. Mor eiglieks verwacht k dat ze de kopkes nog weer oprichten zellen, mor wis ben k niet.

Flabbergasted en Flappergeesterd

Dit stuk gijt over flabbergasted en flappergeesterd. Leste joaren heur je geregeld t woord flabbergasted. Dat was veur mij aanleideng om n nij gedicht te begunnen. Woarom bruken we nije, onbekende woorden? Wat dut dat met ons, met de spreker en met de toeheurders? Dat viend ik ienteressante vroagen.

Op de vergoadereng van de Pervincioale Stoaten van 9 meert was der aandacht veur Meertmoand Dialectmoand. t Heb twee gedichten veurdroagen en dizze was der een van. Het gedicht hiet Surprise. Dat ken-je op zien Engels en op zien Fraans lezen. De bedoeleng is dat joe t uutspreken op zien Engels. 

k Heb t veurdroagen. En vanòf min. 4.54 is t gedicht Surprise met flabbergasted.  

Wieten joe wat flabbergasted betekend? Ik heb t opzocht. Flabbergasted betekent: dumbfound, stunned, surprised, blown away, astonished, baffled, startled, puzzeld, shocked, en nog veul meer. Vremd genog, as je minsen vroagen wat flabbergasted betekent, kriegen-je dizze antwoorden noeit. Ik ben ns op zoek goan noar de herkomst.

Woar komt flabbergasted weg? Feitlieks komt et uut t middeleeuws Engels van de streek van Suffolk. Dus t is n streektoalwoord.

• Flabber. Dat het te moaken met sloagen, klappen. Dat komt mooi uut, want ien t Grunnegs en t Vries hemmen je ok t woord Wilsterflappen. Wilsters bennen 'goudplevieren', vogels ter grootte van n kiewiet, die vroeger vongen werden met klapnetten. Dus is flabber is  flappen.
• Gasted. 'Agasten' ien middeleeuws Engels is schrik aanjoagen. t Old Engelse woord is 'gæst' verwiest t schrik aanjoagen deur 'geasten'. Dat liekt op geest, geist ien t Duuts, gaist ien t Hogelaandsters, geast ien t Frysk. Duutsers hemmen 'begeistert' en 'entgeistert' (stomverboasd). Met t waarkwoord geestern kom ik uut op geesterd. Je bennen zo aangesloagen, asof je n geest zien hemmen. Of de geest ien e persoon is huulmoal vot. Verstiefd van schrik, riddersloagen, tetoal verbilderd en verballereerd.

Zo kom ik op zien Grunnegs uut op flappergeesterd!

Op de poster nog meer woorden die te moaken hemmen met flappergeesterd. k Ston versteld van de uutdrukkengs die der aalmoal warren.

 

Bakkerom boven wotter

Met zoveul zun de leste week ken-je je zowat niet meer veurstellen dat et n moand terug sjompeg nat was. En ien e diepen en kenoalen ston t wottter hoog. 

 Ien jannewoari n 75-80 mm. Ien feberwoari is der wel n 130-160 mm ien t Westerkertier vallen. t Was slim nat de eerste twee moanden van t joar. Doarom wer de wotterbaargeng van Bakkerom ien gebruuk nommen; ze warren nog mor krekt kloar. En wordt der beweerd: t gebeurt mor een moal ien 25 joar, dat t laand onder wotter komt. 

Nou is t wotterschap ien e weer met t leegmoaken van de polder de Dieken-Bakkerom. Laand komt weer boven wotter. 

Meerkoeten vertraauwden et niet, toen del kwam. Ze gingen aalmoal an e flidder.