Zoete harde broodjes

t Is woar. t Is waarachteg woar. Langere tied docht ik aal dat der wat loos was. Bakkerij Joager har ze al n tied niet meer. 

Nou wiet ik t zeker. De zoete harde broodjes uut Wildervank bennen verdwenen. Dat moeit me.

k Heb met Wieringoa Febriek sproken dizze week over heur hardbroodjes zoas ze zeggen. Wieringa Wildervank.

Zoete harde broodjes bennen vot. Ze bakken ze niet meer. t Is òflopen, t is beurd, t is doan. Schane, schane. Verbaauweng, aanschaf nije mesjienes, vervangeng, hoge ienvestereng en zuks wat meer. Twee joar leden gebeurd.

Gien wanklank over aandere koekjes- en broodprodukten van Wieringoa. Mor zoete harde broodjes die warren zo lekker met butter, gien margarine, dat veural niet.

Zoete harde broodjes met butter. 

Je kennen op internet kieken. Der stijt wat ienformoatsie bij Levend Erfgoed Groningen - hoezo levendeg aarfgoed, t is ja dood as n pier. Meer as d'eierbal of eierbaale, harren dizze zoete harde broodjes recht op n langer leven.

k Ken der nog niet bij, woarom zukse lekkere koekjes/broodjes niet meer moakt worden. 

Zoete harde broodjes - n herinnering die langzoam wegteert. 

OPROEP: wel het veur mij t resept van zoete hard(e) broodjes?  

PS: ik heb zoete hardebroodjes schreven, zo is de noam van t koekje ien mien herinnereng van joaren 70-80 hangen bleven. misschien zit ik op n onzin. Wel t wiet mag t zeggen.

Merelnusten ien juli

Leste joaren broeden vogels alsmor langer deur noa de langste dag. k Wiet niet of dat ze an heur darde of vierde leg begunnen. Meerkoeten, wotterpiekjes, merels, dat gijt en leit mor deur. 

Ien Bourgondië von k merelnust ien n dikke heeg: 22 juli. Kom doar mor ns bij. Rozen, brommels, sleedoorn, hoageldoorn, zo nou en dan n es en n ekkelboom. En dan nog omgeven deur minshoge brannekkels. Hegen bennen 2-3 meter hoog mor veural dicht. Doar ken gien stiekeldroad tegenop.

t Laandschap zit vol met hegen en boskes. Prachteg om te wandeln. 

Charolais koeien keken op òfstaand toe.

Groen en old

De tied dat ze omringd wer deur bomen ien de vroege jeugd, leit ver achter heur.

Jonge loten van kestanjes nammen de ruumte ien. Nou hemmen olde bomen heur aan t zicht van veurbijgangers onttrokken. 

Zo sliet ze de doagen ien òfzundereng. Troanen zel ze niet meer loaten. Gien zunnestroal en gien mins die heur warmen ken. Kestanjebomen schermen heur òf. Mos bedekt heur vochtege plakken. 

t Wachten het ze opgeven, mor ze blift stoaren.

Staandbeeld ien Frankriek - Bourgondië.

Blad ien licht op Kuzemer

Een zee mij: wat n mooie ekkelbladden. 

Aander zee: wat is t licht van t gras mooi.

Denkelek kennen veurgrond en achtergrond niet zunder nkander. Ze hemmen nkander neudeg - n soort yin en yang. 

Veul zoaken hemmen meer loagen; voak n kwestie van kieken en luustern.
 

Muntjeziel en Muntsjesyl en Munnekezijl

Der bennen dörpen ien Grunnengen doar wordt Vries sproken. Luu proaten Grunnegs, Westerkertiers en Vries/Frysk. t Bennen dörpen as de Wilp, Moarum, Visvliet, Opende. Zo bennen der ok dörpen ien Vrieslaand doar je Frysk en varianten van t Westerkertiers heuren kennen. 

Muntjeziel is zuks n dörp. Hierboven n doek hoe Muntjezielsters en Muntsjesylsters heur prissenteren - Muntje Buiten. Der bennen meer dörpen met lokoale varianten: Gerkeskloosters, Kollumers, Boerummers, voak n mengeling van Vries en Grunnegs. 

Nou hemmen ze ien Noard-East Fryslân docht: "It Frysk moat foarop". En zo bennen der nije bredden kommen. Ruumte veur it Frysk en Nederlaands. En toen was der gien ruumte veur Muntjeziel. 

Et voelt wat aan as t herschrieven van de Muntjezielsters geschiedenis. Dat valt mij wat òf van Noardeast Fryslân. Altied ien e bres veur minderheden. En nou ruumte opeisen veur eigen toal - en uut t oog verliezen woar n aander verlet van het - zo mor identiteit van n aander met voeten treden. 

t Onevenwichteg gebruuk van t Frysk het wat weg van n toalzuvereng. Me dunkt, dat kon toch wel wat aans ien e 21ste iw.

k Ree deur noar de Kollumerwoard oostkaant Muntjeziel. Doar is n proefboerderij met drie vlaggestokken. Wiend speulde met de Nederlaandse en Grunneger vlag. "Fryske flagge" dee niet met. t Was krekt of de vlag heur schuldeg voelde.

Zummer aan t Nijhoofster Diep

t Was schier weer toen k op n zotterdag deur t laand liep. Hier har ik nog noeit west.

Aan t Nijhoofsterdiep. Ien e verte zag je de toren van Nijhoof. 

Alles was rusteg. De landerijen, de dörpen, de wierde en t wotter dat noar Nijhoof voer. 

Plasdras wer extensief beweid. Vogels warren nog druk met jongen ien t gebied, hoewel et al tegen t enne van juni liep. 

En n gele kwiksteert.

Optreden Grunneger dichters Prinsentuun Hoaren - 9 juli

Op 9 juli is der n optreden van Grunneger dichters bij de Dichters ien e Prinsentuun. Mien optreden is op Zotterdag 9 juli om 13.30 ien de Engelse keukentuun.

Krekt as verleden joar is dat dizze keer niet ien t centrum van Stad, mor ien Hoaren (Haren). Veur de Grunneger dichters is n apad program moakt en n hoekje regeld ien de Engelse keukentuun "Grunnegers ien t Gruin / Grunnegers in t Groen". Veur t program kiek mor even: Dichtersindeprinsentuin - Grunneger Dichters

Dit wordt met organiseerd deur "Centrum voor Groninger Taal en Cultuur". Woarom ze niet Centrum veur Grunneger Toal en Kultuur hieten, is mij n roadsel, mor wel wiet kom k doar nog n keer achter. Ze konden noatuurlek ok "Centre for Groningse Language and Culture" hieten.

Hoarener Hortus is n mooi plak veur poëzie. Verleden joar was dat ok aal t geval. Veul ruumte, mooie tunen en sfeervol.